歐洲冠軍杯八強之戰解籤攻略
2018-03-18 11:52:04 作者：李路明阅读数: 我要发言(0) 收藏本文

勁爆體育歐冠：每年嚟到呢個時候，相信廣大波友最關注嘅足球賽事依然係歐冠，唔少人包括筆者認為，相比起決賽或者準決賽，八強往往係最吸

勁爆體育歐冠：每年嚟到呢個時候，相信廣大波友最關注嘅足球賽事依然係歐冠，唔少人包括筆者認為，相比起決賽或者準決賽，八強往往係最吸引眼球嘅環節，因為歐冠本身嘅睇頭就係唔同聯賽嘅頂級球隊一決高下，而呢個階段啱好最大化滿足咗大家嘅胃口。隨住日前抽籤結果出爐，唔少觀眾發出咗唔滿意嘅聲音，覺得唔夠刺激，究竟事實係咪咁呢？下列就由筆者發表一啲各組對決嘅愚見。

    紅藍軍團笑贏紅狼

    單從牌面嚟睇，擁有美斯嘅巴塞始終係最具競爭力嘅球隊，阿根廷球王喺十六強兩回合嘅個人show話畀人聽自己年過而立依然屹立巔峰。睇翻晉級歷程，其實都咪話巴塞籤運好，分組賽就有祖記相伴，十六強就同「老友」車仔會面(兩隊分別係上季意甲同英超聯賽冠軍)，而紅藍軍團照樣無風無浪殺入八強，盡顯奪冠大熱本色。正所謂時來運到，過咗兩個難關，輪都輪到自己執翻啲筍嘢喇啩。我聽到有唔少聲音係話「歐足聯陰謀論保送巴塞入四強」，諗深一層，如果巴塞喺呢round同曼城、皇馬或者拜仁相遇，巴塞擁躉會冇怨言？

    相比之下，從分組賽開始羅馬就被定位成陪跑嘅角色，皆因佢哋當時分咗同馬體會仲有車仔一組，點知最尾頭名出線，真係畀咗唔少驚喜大家，十六強能夠遇到實力偏弱嘅薩克達都算係個天獎勵翻佢哋。至於嚟到八強，相信除咗西維爾，羅馬對住另外6隊都係處於下風，所以真係唔洗怨。要同巴塞硬撼真係唔實際，特別係面對咁高質素嘅傳控打法，等一次反擊都難過登天，想完成爆冷，確實唔知要幾高成功率先夠。或者退一步諗，最終畀奪冠大熱淘汰都係一種榮幸。

    德甲班霸好事成雙

    身為德甲球隊喺歐冠淘汰賽嘅獨苗，拜仁承載住祖國人民所有期望，而為咗平衡翻五大聯賽喺歐冠嘅競爭力、保證足夠綽頭，大膽講句，歐足聯點會咁易畀佢哋死？既然分組賽體驗過巴黎聖日門嘅「金元攻勢」，根據「人品守恆定律」(註：意思係人有三衰六旺，唔會一直黑仔)，十六強係咁咦分翻個比錫達斯畀佢哋囖，兩回合8比1嘅比數已經講明一切。仲未夠？好事成雙八強送多個西維爾你哋嘆下。值得一提嘅係，自從2011年之後，此前6屆歐冠盃拜仁凈係舊年缺席咗四強，今年係時候傳承翻「優良傳統」喇。最重要係，功勛教頭軒歷基斯重執教鞭以嚟，球隊同安察洛堤麾下相比簡直係判若兩隊，前者亦喺最近刷新咗自己所創嘅歐冠主帥最長連勝紀錄(十一連勝)。總體嚟講，拜仁晉級前景一片明朗。

    等咗六十年，西維爾今季終於實現咗球會咁多年嚟未躋身過歐洲頂級賽事嘅八強夢。面對住全隊身價超過7億歐元嘅曼聯，西維爾被外界一致睇衰；正所謂「上咗場就唔好怯，怯就輸足一世喇」，西維爾從伺機待發到最終完成致命連擊，呢次華麗嘅逆襲唔單只幫AC棄帥蒙迪拿「洗脫罪名」，仲為所有西維爾球員、擁躉帶嚟無盡喜悅，絕對係載入史冊嘅一役，同舊年淘汰自己嘅李斯特城真係有幾分相似。一句到尾，西維爾嚟到八強算係完成任務喇，今次對手拜仁同曼聯完全唔同，無論球隊體系、領隊戰術甚至近年歐冠成績，德甲班霸都明顯好過紅魔鬼，黑馬本色極有可能就此告一段落。

    我好似睇過呢一集

    皇馬對祖記？我哋冇睇錯，唔係舊年歐冠決賽重播，只不過係提早見面。同前兩組對決唔同，佢哋再次聚首真係令人浮想聯翩，但結果無非二選一，皇馬繼續壓制祖記or祖記成功雪恥皇馬。睇翻佢哋賽季至今嘅成績，祖記依然係意甲班霸，聯賽重新翻到熟悉嘅領跑位置，歐冠晉級歷程無風無浪，實力同上季相比無太大變動，甚至內在層面多咗一份沉穩。但皇馬就今時唔同往日囖，聯賽爭冠希望渺茫，國內盃賽冇份爭標，唯一希望得翻歐冠。如果可以再度蟬聯，三連冠呢個紀錄預計未來好多年都難有球隊打破。喺咁嘅前提下，雖然實力同狀態睇起身都唔及舊年，不過所有注意力集中喺一條戰線嘅銀河戰艦似乎更加無懈可擊。一切都要等到大家明刀明槍先見分曉。

    英超兩大流派決戰

    唔洗講都知，主流聯賽最具觀賞性嘅必然係英超，雖然話今屆5支參加歐冠嘅球隊全部殺曬入十六強，不過嚟到呢個階段就係得翻兩支，令人更加感到唏噓嘅係，下一圈嘅四強得翻一支，同過去幾年西甲頻頻有三隊殺入四強嘅強盛真係冇得比。點都好，曼城同利物浦總算係當今英超最具觀賞性嘅球隊。先講藍月亮，哥迪奧拿喺度將自己嘅藝術發揮到極致，今季重金打造嘅後防線為衝鋒陷陣嘅一眾攻擊手最大化保駕護航，高速率傳控滲透令其進攻變得無堅不摧，令今季英超冠軍歸屬變得毫無懸念。而喺主打高壓迫搶反擊嘅克洛普麾下，利物浦今季始終保持頂級競爭力，如果唔係欠缺足夠穩定性，佢哋肯定唔止係爭前四咁簡單。回顧兩隊今季聯賽雙循環交手，大家都喺主場各執一勝，實力可謂不分高低。但畢竟歐冠淘汰賽係180分鐘嘅比賽，到底係更加穩定嘅曼城掌控大局，定係令人熱血沸騰嘅紅軍笑到最後？等我哋拭目以待。

文章关键词：歐洲冠軍杯八強欧洲足球劲爆体育足球

歐洲冠軍杯八強之戰解籤攻略
2018-03-18 11:52:04 作者：李路明阅读数: 我要发言(0) 收藏本文

评论排行

最新资讯

歐洲冠軍杯八強之戰 解籤攻略 2018-03-18 11:52:04 作者：李路明 阅读数: 我要发言(0) 收藏本文

延伸阅读：

评论排行

最新资讯

合作伙伴

歐洲冠軍杯八強之戰解籤攻略
2018-03-18 11:52:04 作者：李路明阅读数: 我要发言(0) 收藏本文