首页 > 2018 > H组 > 正文

俄羅斯世界盃前望 H組齊齊睇 日本
2018-05-27 23:11:29   作者:Russia2018   阅读数:   我要发言(0)   收藏本文

勁爆體育2018世界盃:同世界盃G組嘅強弱分明唔同,H組就真係明顯更加均衡,哥倫比亞、波蘭、日本和塞內加爾自身都有看家本領,雖然從表面

\
 
    勁爆體育2018世界盃:同世界盃G組嘅強弱分明唔同,H組就真係明顯更加均衡,哥倫比亞、波蘭、日本和塞內加爾自身都有看家本領,雖然從表面上睇哥倫比亞實力高出一籌,但正所謂「波,係圓嘅」,喺競爭異常激烈嘅H組當中,邊個最終能夠脫穎而出確實都有可能。
 
\

日本渴望迎來突破
 
    作為亞洲足壇多年嘅「Icon」,日本喺咁多屆世界盃征途上最遠行到去十六強顯然辜負一眾擁躉嘅期望,但如果佢哋想要喺今夏俄羅斯賽場上迎嚟突破亦恐怕無咁容易。臨陣換帥往往係兵家大忌,而日本就喺今年4月選擇放棄與球員們相處關係緊張嘅夏利荷錫,繼而任命現任日本足協技術委員長西野朗接過教鞭。

    雖然話就話長痛不如短痛,但留俾年過六十匆忙上任嘅西野朗只有兩個月嘅磨合時間,要想喺寥寥數場熱身賽當中灌輸更多自己嘅執教諗法絕非易事。更為閉翳嘅係,國家隊一批重臣由於逐漸被時間老人搵上門,喺隊內嘅作用已經持續下降,其中兩大支柱香川真司和本田圭佑近年個人發展軌跡皆大不如前,如今再想孭起成班波實在係勉為其難。

    至於喺英超搵食嘅前鋒岡崎慎司亦更多充當一枚戰術棋子而非攻堅首選,只有隊長長穀部誠喺中場線繼續肩負起傳承嘅重責。當然日本向來並唔缺乏新鮮血液嘅湧現,如喺西甲賽場時有亮眼演出嘅新一代大腦柴崎嶽就有望獨當一面、而逐漸受到重用嘅原口元氣亦令攻擊線上有更多可能性。至於踢法更加歐式嘅兩位新星淺野拓磨和井手口陽介更加隨時有力帶嚟驚喜。

    不過與進攻端相比,防守端恐怕會成為阻撓日本喺分組賽殺出重圍嘅最大不利因素,正選門將川島永嗣年事已高,以吉田麻也為首嘅後防線則穩重感欠奉,想要抵擋同組對手中如法卡奧和利雲度斯基等入球機器嘅來襲可謂難過登天。

    喺4年前嘅巴西世界盃,日本最終分組墊底出局;如今4年後實力甚至有所下滑,噩夢隨時重現。
 
\

 

文章关键词:日本 2018世界盃 H组 勁爆體育